Дін мен дәстүр – теріс ағымға тосқауыл
Қазақ халқының рухани болмысы ғасырлар бойы дін мен дәстүрдің тұтастығымен қалыптасқан. Халық дүниетанымының өзегі – иман мен ізгілікке негізделіп, әрбір салт-дәстүр діни құндылықтармен үйлесім тапқан. Қазақ даналығында «Діні жоқтың – пірі жоқ», «Жақсының жақсылығын айт, нұры тасысын» деген сөздердің айтылуы да – ел ішіндегі тәрбие мен руханиятқа деген құрметтің жоғары болғанының айғағы.
Дін – Алланы танып, құлшылық етумен шектелмейтін, адамды әдепке, мейірімге, адамгершілікке тәрбиелейтін рухани мектеп. Ал дәстүр – осы асыл құндылықтарды ұрпаққа жеткізетін алтын көпір. Сондықтан қазақ халқының болмысында дін мен дәстүр ешқашан бөлек қаралмаған, егіз ұғым ретінде өмір сүрген.
Алайда қазіргі ақпараттық заманда түрлі жат идеологиялар мен теріс ағымдардың ықпалы артып келеді. Олар санасы қалыптасып үлгермеген жастарға әсер етіп, қоғамның бірлігіне сызат түсіруі мүмкін. Мұндай жағдайда ұлтты рухани тұрғыдан қорғайтын негізгі күш – төл салт-дәстүрмен үйлескен дұрыс діни түсінік.
Дін мен дәстүрдің үйлесімі
Қазақтың көптеген әдет-ғұрыптары исламдағы ұстанымдармен үндес келеді. Соның ішінде:
-
Сәлем беру – сүннет;
-
Қонақ күту – сауап;
-
Жетім-жесірге қамқор болу – парыз;
-
Тазалық – иманның жартысы.
Тарихқа көз жүгіртсек, ата-бабамыз дін қағидаларын өз болмысына лайықтап, салт-дәстүрмен сабақтастыра қабылдағанын көреміз.
Теріс ағымнан сақтану жолдары
Қоғамның рухани қауіпсіздігін қамтамасыз ету үшін төмендегі шаралар маңызды:
-
Діни білімді тек сенімді, ресми діни орталықтардан алу;
-
Діни мәселелерде мешіт имамдары мен теолог мамандардың кеңесіне жүгіну;
-
Ұлттық салт-дәстүрді құрметтеу және оны жас буынға дұрыс түсіндіру;
-
Отбасындағы рухани тәрбиені күшейту;
-
Ақпараттық сауаттылықты арттыру.
Қорытынды
Қорыта айтқанда, дін мен дәстүр – қазақ қоғамының рухани тірегі. Осы екі құндылық қатар сақталған жерде теріс ағымдарға орын болмайды. Имандылық пен ізгілікке негізделген салт-сананы қорғау – әрбір азаматтың борышы. Ұлттың рухани тұтастығы да осыған байланысты.
Алла Тағала халқымызды адасушылықтан, жат ағымдардың ықпалынан аман қылғай!
“Абахалис Кәрімұлы” мешітінің имамы
Ментаев Алишер Толегенович
