Имам – ағартушы ұстаз
Имам – қоғамды тәрбиелеуші, ағартушы ұстаз. Отаншыл, еңбексүйгіш, аманатқа адал, ата-анасын қадірлейтін иманды ұрпақ тәрбиелеуде имамның атқаратын рөлі ерекше. Аллаға шүкір, халқымыздың рухани дамуына, қоғамда отбасы құндылығының артуына ағартушы ұстаздар мен дін қызметкерлері үлкен үлес қосып келеді.
Өздеріңізге белгілі, Мемлекет басшысы Қасым-Жомарт Кемелұлы 2022 жылды Балалар жылы деп жариялады. Президент: «Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз. Мен Мемлекет басшысы ретінде өскелең ұрпақтың болашағына баса мән беремін», деп атап өтті.
Отбасындағы бала тәрбиесі – өзекті мәселе. Осы ретте мешіттер жанынан ашылған отбасылық кеңес беру орталықтарының жұмысына баса назар аударылып отыр. Шын мәнінде балалар арасында көзі ашық, көкірегі ояу, ойы ұшқыр бүлдіршіндер аз емес. Алайда олардың телефонға тәуелділігі, психологиялық күйзелісі мен жаман әдеттерге әуестігі кез келген ата-ананы ойландырмай қоймайды.
Имамдарымыз бен ұстаздарымыз осы мәселе бойынша ата-аналарға рухани тұрғыдан көмектесіп, тиісті кеңес беріп келеді. Өйткені ұрпағымызды отансүйгіштікке, ата-ананы қадірлеуге, имандылық пен адамгершілікке баулуымыз керек. Осы бағытта Қазақстан мұсылмандары діни басқармасы жанындағы Әйел-қыздар секторы мен Жастар секторы ата-аналарға кеңес беру семинарларын, балаларды, жасөспірімдерді имандылыққа тәрбиелеуге бағытталған дәрістер ұйымдастырып келеді.
2022 жылы еліміз бойынша халыққа отбасы құндылығы, Отанның қадір-қасиеті, еңбек етудің маңызы, салт-дәстүр тақырыптарында 274 872 уағыз-насихат айтылды. Жыл бойы халықтан келіп түскен 164 229 сұраққа жауап берілді. Отбасыларға кеңес беру мақсатында 7918 кездесу өткізілді. Біздің имамдарымыз ажырасу туралы шешім қабылдаған көптеген отбасына түсіндірме жұмыстарын жүргізіп, олардың некелерінің бұзылмауына ықпал етуде. Аллаға шүкір, осындай табанды еңбектің арқасында қаншама отбасының шаңырағы шайқалмай, басқа түскен сынақты сабырмен жеңіп, үйлесімді өмір сүріп келеді.
Қазір қоғам өнегелі рухани ұстаздарға мұқтаж. Дін қызметкерлеріне арналған жиындарда қоғамның рухани қажеттілігін өтеуде имамдардың белсенді болу қажеттігін үнемі қаперге салып келемін. Бұл істе табандылық пен тұрақтылық танытсақ, мемлекетіміздің болашағына үлкен үлес қосатынымыз сөзсіз. Алла Тағала құдси хадисте: «Құлымның ғибадатының маған ұнамдысы – Мені танытуы мен Менің атымнан насихат етуі», деп баяндайды. Бұл хадис барша дін қызметкеріне үлкен жігер беретіні сөзсіз.
Қазіргі таңда имамдардың жан-жақты, білімді болуы – заман талабы. Сапалы діни кадр даярлау – Діни басқарманың негізгі жұмыс бағытының бірі. Бүгінгі таңда еліміз бойынша 7 258 дін қызметкері жұмыс істейді. Оның 5 228-і – кәсіби діни маман. Діни салада 206 (39%) магистр, 10 (2%) ғылым докторы қызмет етуде. Қарилар саны – 132 (25%). 2023 жылы жоғары және арнайы орта діни білімі бар дін қызметкерлерінің (69%) санын 5 пайызға (74%) көтеру жоспарға енгізілді.
2022 жылы имамдардың білімін жетілдіру мақсатында Астана қаласынан Хусамуддин әс-Сығанақи атындағы ислам институтын аштық. Қазір институтта 40 имам білімін жетілдіруде. Жас қариларымызды жігерлендіру мақсатында институт жанынан Ижаза беру орталығын іске қостық. Бүгінгі таңда республика бойынша 7 қарилар дайындау орталығында 536 қари Құран жаттауда.
Осы жылы 603 студент Нұр-Мүбәрак университетін, 9 медресе-колледжін және Хасеки академиясын бітірді. 158 имам Республикалық имамдардың білімін жетілдіру ислам институтында білімін жетілдіріп шықты. 1248 имам арнайы аттестаттаудан өтті. Имамдардың білім деңгейін көтеру бойынша «Үздіксіз білім беру тұжырымдамасы» құжаты қабылданды.
Өздеріңізге мәлім, көп жағдайда жас мамандар үлкен қалаларда қызмет етуді мақсат тұтып, барын салады. Әрине, бұл – жақсы талпыныс. Алайда бұл үрдіс ауылдағы мешіттердің жұмысына кері әсер ететіні белгілі. Біз осы орайда «Жас маман, ауылға қадам бас, маман» жобасын жүзеге асырып келеміз. Осы бағытта жас діни мамандарды ауылға қызметке тартудың кешенді бағдарламасы әзірленуде. Мақсатымыз – ауылдағы мешіт жұмысын жандандыру. Ауылға діни қызметке баратын жас мамандардың әлеуметтік мәселесін толық шешу бағытында тиісті жұмыстар атқарылып келеді. Алла қаласа, қолға алған бұл жоспарымыз ойдағыдай жүзеге асады деген үміттеміз.
Наурызбай қажы ТАҒАНҰЛЫ,
ҚМДБ Төрағасы, Бас мүфти
