Наурызбай қажы Тағанұлы «Өмірге үміт сыйла» акциясына қатысты
Бас мүфти Наурызбай қажы Тағанұлы Қарағанды облысына барған сапарында «Әнет баба» мешітінде көмекке мұқтаж отбасыларға қайырымдылық көмектің сертификатын табыстады.
«Құранда Алла Тағала: «Алланың жолында не жұмсасаңдар да, Алла Тағала міндетті түрде оның орнын толтырады» деп баяндаған Қайырымдылық – мұқтаж жандарға көрсетілер нақты көмек, ізгіліктің анық көрінісі, адамның асыл қасиеті. Кісінің айналасындағы адамдарға танылатын тамаша қыры да қаншалықты қайырымды екенінен байқалады. Қандай жағдай болмасын, мұсылман баласы өзінің рухани құндылығын сақтап, қысылтаяң жағдайда еш өзгерместен, белгілі мақсатты көздемей халыққа қол ұшын созуы қажет. Игі іске атсалысқан барша азаматтарға Алла разы болсын» деді Наурызбай қажы Тағанұлы.
ҚМДБ «Зекет және қайырымдылық» қорының ұйытқы болуымен «Өмірге үміт сыйла» акциясы бойынша 7 отбасыға қаржылай сыйлықтың сертификаты табысталды.
