«Өкілдік сағатында» Ақтөбе облысының жұмыс есебі тыңдалды
Бүгін Астанада Бас мүфти Наурызбай қажы Тағанұлының төрағалығымен кезекті «өкілдік сағаты» өтті.
Онлайн форматта өткен жиынға ҚМДБ қызметкерлері мен Ақтөбе облысының имамдары қатысты. Жиналысты ашқан Наурызбай қажы Тағанұлы: «Біз бұған дейін бірнеше облыс бас имамдарының қатысуымен «өкілдік сағаты» жобасы аясында арнайы жиналыс өткіздік. «Өкілдік сағаты» жобасының басты мақсаты – облыс имамдарының өңірде атқарып жатқан жұмыстарымен жақын танысып, тиісті нұсқама, қажетті кеңес беру, сонымен қатар ҚМДБ қызметкерлері мен облыс имамдарының ортақ жұмыстарын жүйелі түрде үйлестіру. «Өкілдік сағаты» жобасы діни саладағы іс-шараларымызды сапалы әрі жоғары деңгейде ұйымдастыруға серпін береді деп сенемін» деді.
Жиналыс барысында Ақтөбе облысының бас имамы Серікжан Еншібайұлы Бас мүфтиге, ҚМДБ қызметкерлеріне жыл басында бекітілген бес бағыт (дін мен дәстүр, ізгі қоғам, ихсан және насихат, діни оқу-ағарту, жат діни ағымдардан сақтандыру) бойынша атқарылған жұмыстар жайлы есеп берді. Сонымен қатар бес бағытқа жауапты ҚМДБ бөлім меңгерушілері Ақтөбе облысының имамдарына жұмысты жетілдіруге қатысты ұсыныс-пікірлерін жеткізді.
Жиын соңында ҚМДБ Төрағасы мүфтият қызметкерлері мен Ақтөбе облысының имамдарына нақты тапсырмалар жүктеп, жыл басында бекітілген жұмыс жоспарына сәйкес іс-шараларды жоғары деңгейде ұйымдастырудың маңызын атап өтті.
