Уақыттың қадірі
Уақыт – адамға берілген ең қымбат нығметтердің бірі. Байлықтан айырылған адам оны қайта табуы мүмкін, бірақ босқа өткен бір сәтті ешқашан қайтара алмайды.
Бір данышпаннан: «Өмірдегі ең қымбат нәрсе не?» – деп сұрағанда, ол: «Алтын да, күміс те емес, өткен бір минут. Өйткені алтынды қайта табуға болады, ал өткен уақыт ешқашан қайтып келмейді», – деп жауап берген екен.
Сондықтан әрбір минут пен сағаттың қадірін біліп, оны пайдалы іске жұмсау – ақылды адамның белгісі.
Қазақ халқында: «Уақыт – алтыннан қымбат», – деген нақыл сөз бар. Бұл сөз уақыттың материалдық байлықтан да жоғары құндылық екенін көрсетеді. Себебі алтынды сатып алуға немесе табуға болады, ал өткен уақыт мәңгілікке кетеді.
Ислам діні де уақыттың маңыздылығына ерекше мән береді. Құранда Алла Тағала уақытпен серт етеді. Ал Пайғамбарымыз (оған Алланың салауаты мен сәлемі болсын):
«Адамдардың көбі қадірін білмейтін екі нығмет бар: денсаулық және бос уақыт», – деген.
Мұсылман адам әр күнін құлшылықпен, адал еңбекпен, білім ізденумен және адамдарға пайда келтіретін істермен өткізуге ұмтылады. Бос уақытты орынсыз әңгімеге, жалқаулыққа немесе пайдасыз іске жұмсау адамның өміріндегі үлкен ысырап саналады.
«Бүгінгі істі ертеңге қалдырма», – деген нақыл сөз уақыттың қадірін еске салады.
Бүгінгі таңда технологияның дамуы адамдардың уақытын үнемдеуге мүмкіндік бергенімен, кейде әлеуметтік желілер мен ойын-сауыққа шектен тыс әуес болу уақытты босқа өткізуге себеп болады. Сондықтан әр адам өз күнін жоспарлап, маңызды істермен өткізгені жөн.
Уақытты қадірлеу – табысты өмірдің кепілі. Күн сайын пайдалы кітап оқу, жаңа білім үйрену, ата-анаға қызмет ету, адал еңбек ету және қоғамға пайда келтіру – уақытты тиімді пайдаланудың жарқын үлгілері.
Уақыт – Алланың адамға берген аманаты әрі өмірдің өлшемі. Оның әр сәтін бағалап, ізгі істерге жұмсаған жан бұл дүниеде де, ақыретте де игілікке жетеді. Сондықтан бүгінгі күннің мүмкіндігін жібермей, әр минутты мәнді өткізу – әрбір адамның басты міндеттерінің бірі.
Талғар ауданы, Тұздыбастау ауылы «Әл-Бұхари» мешітінің имамы
Бахтыбай Жарылқасымұлы
